يابو الوفه

قصيدة / يابو الوفه
...............................
...............................


يابوا لوفه يا بوا لوفه

ساقي العطاشه بْكربله يابو الوفه يا بو الوفه
شبل الوصي حامي الحمه يابو الوفه يا بو الوفه

........................

عباس ابو الغيره الوفي صف البطوله وْيالكرم
طف كربله يشهد اله جيش الظلم منه انهزم
تحده المنيه والخطر ماهمه رمح وْ لا سهم
الْحده فلا واحد وصل عالمشرعه واگف علم

راعي الوفه مي ماشرب يابو الوفه يا بو الوفه
صوت العطاشه يْألمه يابو الوفه يا بو الوفه

........................

حيدر علي بالمعركه شامخ بطل مثل الجبل
ليث الهواشم وابْفخر ذل الاعادي ابن الفحل
بالمعركه چن عاصفه بجيش الدعي ضاع الامل
خيل وْسيوف تْجمعت تگصد ابن خير العمل

غدرو يمينه وْيسرته يابوالوفه يا بو الوفه
زنده العلم ما سلمه يابوالوفه يا بو الوفه

........................

بعزمه يلاويها الزلم حامل جِرِبته اعْله الظهر
سهام الغدر من صابته گلبه على الجربه انعصر
نيته يِوَصِلها الخيم انصابت جربته وانغدر
اسهام المنيه الحاقده النزلت عليه مثل المطر

صابتله عينه اوْجربته يابو الوفه يا بو الوفه
الزمره اللعينه الظالمه يابو الوفه يا بو الوفه

........................

كل الجِراحات المضت حامل اثرها بْقوته
مو بس چفوفه مگطعه وْ دمه النزف من هامته
كل هالجروح البالجسم صابر اشَم ما همته
ناده الامامه وْ سيده نظرة وداع الشوفته

حسين نْتفض لمّن سمع يابو الوفه يا بو الوفه
صوت الاخيه من السمه يابو الوفه يا بو الوفه

........................

لمّن وصل يمّه وْ گعد يسمع كلام يْردده
رايد لخيّه يْودعه بحظنه الحسين تْوسده
صار الكلام وْ اليدمع بين الچفيل وْ قائده
يمسح دموعه يْكلمه ظهري انكسرحزني ابتده

مْودعك يخويه وْ يالنبي يابو الوفه يا بو الوفه
لحظة وداع وْ حاسمه يابو الوفه يا بو الوفه

........................

نعزي العقيله ام الخدر وام البنين الطاهره
بليث الليوث ابن الاسد روح الزچيه وْ حيدره
سطّر ملاحم بالحرب مهيوب سبع الگنطره
ضحَه الْامامه وْ مذهبه الاخر حياته ايناصِره

باب الحوايج مفخره يابو الوفه يا بو الوفه
ابن الرضيه العالمه يابو الوفه يا بو الوفه


.......................................
.......................................

خادم اهل البيت ( ع )
الشاعر الحسيني
سعيد الفتلاوي الطويرجاوي