گوم عزّي فاطمه

قصيدة / گوم عزّي فاطمه
.......................................
.......................................

يالموالي وْ ياي گوم وْعينها
اليوم عزّي فاطمه بحسينها

........................

ناده ابو السجاد يوم الملحمه – بالغدر والغيض كلها مْحزمه

كل لعين يْريد ياخذ مَكرمه – بالطفوف الگوم باعت دينها

........................

اِبچي عالمظلوم وانعه حالته – سْهام غدر الگوم گلبه صابته

ظل وَحيد يحوم رافع هامته – صف شِمال الجيش ويه يْمينها

........................

خانو الظلام سبطك يالنبي – غدرو الانذال مولانه الابي

تبعو الملعون ابن الناصبي – عالمُلِك والمال عِمْيت عينها

........................

بكربله مولاي تاريخك يظل – مْسجل الاحداث والطاغي شْعمل

يومك الهاليوم مثله ما حصل – هالجريمه الظالمه احنه نْدينها

........................

بْركضة طويريج وقعنه العهد – تبقه ثار الله دوم وْ للابد

نفتديك ارواح ماهمنه العدد – ركضة طويريج سِر تكوينها

........................

بْكل عزه للشيعه ذكرك يالولي – واِلمصاب البيك هوّه الاولي

باللطم وِبْصوت تِصرخ يا علي – هالولاء يْدوم بينه وْ بينها

........................

يا ابو الاحرار منك كل عزم – لا اَمن مولاي عِدنه وْلا سِلم

نْريد راعي الزود النه ينتقم – عالطغات يثور يفني شينها


..................................
..................................

خادم اهل البيت ( ع )
الشاعر الحسيني
سعيد الفتلاوي الطويرجاوي