إخـت الـعـبـاس ...مـظـلـومـه

الشاعر السيد سعد الذبحاوي
إخـت الـعـبـاس ...مـظـلـومـه إخت العباس
مـاتـت يـا نـاس ...مـهـضـومه إخت العباس
زيـنـب مـن أمها ...ورثت هضمها ...إخت العباس

يـا روح الـمـثـل زيـنـب ضـيم و نايبه شافت
مـثـل زيـنب جذب هيهات إخت لو والدها ناحت
وسـادتـهـا الـحزن و الهم و على حزن الخلق فاقت
الـزمـن مـا يـوم فـرحـها من إنولدت لَمن ماتت
جـرح الأيـام ...ظـل يـلـهـب جـرح الأيـام
يــنـزف آلالام ...مـن زيـنـب جـرح الأيـام
مــحــنــت ألـمـهـا ...ورثـت ألـمـهـا
زيـنـب مـن أمها ...ورثت هضمها ...إخت العباس

الـوادم تـتـضـرب الأمثال إبحزن يعقوب و الخمسه
و لـو حـي الـنـبـي يـعقوب جان إبزينب إتأسه
واحـد فـاجـد و زيـنـب لا واحـد و لا خمسه
جـم يـوسـف نـطت زينب و بالطف غربت شمسه
إبـدم الـشـبـان ...و إخـوتـهـا إلـدم الشبان
سـجـلـت عـنـوان ...مـحـنـتها إبدم الشبان
إبــهـمـهـم و هـمـهـا ...ورثـت ألـمـهـا
زيـنـب مـن أمها ...ورثت هضمها ...إخت العباس

إبـتـدت مـحـنتها يوم الغاب جدها المصطفه المختار
و بـعـد فـقـد النبي شافت إبداره إشلون شبت نار
و شـافـت أمـها خلف الباب ضلعها صوبه المسمار
و أخـوه الـمـحـسن إتشوفه من إتنقطر إبباب الدار
إمـصـايـب و إهـمـوم ...ورثتها إمصايب و إهموم
مـن ذاك الـيـوم ... شـافـتـها إمصايب و إهموم
عــنــدك عـلـمـهـا ...ورثـت ألـمـهـا
زيـنـب مـن أمها ...ورثت هضمها ...إخت العباس

و عـوضـهـا فـقـد أمـهـا علي الكرار والدها
إبـحـنـانـه ضـمها و بعطفه و كل أمنيته يسعدها
و زيـنـب مـن بـعـد فـتره أماني إهوايه تفقدها
فـجـعـهـا الـدهر بالكرار و عليها أحزانه جددها
فـقـد الـكـرار ... فـقـد أمـهـا فقد الكرار
و غـدر الأشـرار ... يـتـمـهـا فـقـد الكرار
إبــغـدرة خـصـمـهـا ...ورثـت ألـمـهـا
زيـنـب مـن أمها ...ورثت هضمها ...إخت العباس

بـعـد حـيـدر أبـو الأيـتام راواها الدهر طشتين
طشت بيه جبد أبو محمد و طشت بيه راس أخوها حسين
مـحـنـه مـن بـعـد مـحنه تنطي الوجه زينب وين
فـقـدت كـل أهـالـيـهـا و المن جا تدير العين
عـالـشـاطي إتشوف ... حاميها عالشاطي إتشوف
مـن غـيـر إجـفـوف ... واليها عالشاطي إتشوف
إبــحـرقـه تـشـمـهـا ...ورثـت ألـمـهـا
زيـنـب مـن أمها ...ورثت هضمها ...إخت العباس

الـمـصـايـب كـلها ورثتها من أمها فاطمه الزهره
و غـدت زيـنـب تـقـابلها إبحلم المرتضه و صبره
و الـبـت زادت إعـلـه أمـها و فاقتها إبمحن كثره
عـاشـت ويـلـي مـظـلومه و ماتت تالي بالحسره
عـاشـت لـوعـات ... غـربـتها عاشت لوعات
إجـفـوف الـحسرات ... دفنتها إجفوف الحسرات
خـلـدت إسـمـها ...ورثت ألمها إجفوف الحسرات
زيـنـب مـن أمها ...ورثت هضمها ...إخت العباس

هـذي زيـنـب الـكـبـره و هذي إهمومها يا ناس
رغـم الـهـضـم من العدوان ما ذلت و دنقت راس
عـلـه إفـراش الأجل و إتصيح وين حسين و العباس
جـفـنـها طبقته إعله الضيم و خمدت زينب الأنفاس
إمـصـابـج بـالـروح ...يا زينب إمصابج بالروح
خـلانـه إنـوح ...يـا زيـنـب إمـصابج بالروح
إبــرمـيـة سـهـمـهـا ...ورثـت ألـمـهـا
زيـنـب مـن أمها ...ورثت هضمها ...إخت العباس