نحبك حب عله الفطره

الشاعر محمد حمزة الكربلائي
إحـنـه صـار سـنـين ....إلك مطلوبين
نقسم إي و حق إدماك....إحنه الما وفينه اوياك
اشـنـعـتـذر يـحسين ....إلك مطلوبين

مـو كـل واحد امن الناس إله توفيق وياكم
مـو كـل الـيحبكم صار متمسك ابمبداكم
مـو كـل الـذي زارك عرف يحسين معناكم
مـو كـل اليهل دمعه يواسي ابحزنه واساكم
و مـو كل النصب مأتم حييه يحسين ذكراكم
الـيـلـتـزم بـيـكـم... كون يوفيكم
ايـطبق جوهر الأحكام ....و لا يتأثر بأوهام
و لا وهـم بـالـديـن....إلـك مطلوبين

نـقـسم لك قسم يحسين و انته أعرف و أدره
لا عـن طـمع لا جنه نحبك حب عله الفطره
نـحـبـك جيه رسول الله يحبك رابع العتره
و انـقـدسـك بـعد أكثر صاحب و فكره
نـحـبـك ثائر و ضحيت محمد ثبتت ذكره
و الله مـنـجـازيـك....لا ولا نـوفـيك
دمـك حـفـر عـزتـنه....يا رائد مسيرتنه
إنـصـيـح بـالـداريـن ....إلك مطلوبين

يـا مـعـدن إلـه الكون يا سر علت الإيجاد
شـهادة اتبشرت بإسمك إسمك رمز الاستشهاد
طـيـب كـربـله دمك دمك يا أبا السجاد
أربـاتـعـش قرن يصيح لا ظالم و لا إستبداد
و صـارت كـربله كعبه و زوارك بلا ميعاد
نـعـتـنـي الـقـبرك....و نلتمس عذرك
و عدكم العذر مقبول....زايركم كرامه إينول
ايـرد قـريـر الـعـيـن ....إلك مطلوبين

حـقـهـا كربله يحسين تفخر بيك و إتفاخر
اتـمنه العرش بيه ايصير موضع جسمك الطاهر
لاجـن شـاءت الحكمه أمر من الأزل صادر
تـحضن كربله جسمك و تصبح مأوه كل ثائر
يـظل قبرك كيان الحق و علمنه التضحيه ناشر
و الـلـيـالـي اتـدور....وهالعلم منشور
و بـقـلـب الزمن راسخ....قله يا قلم أرخ
بـاقـي الـيـوم الـدين ....إلك مطلوبين

إنـتـه الـعرفتنه الدين و دمك ضي عقيدتنه
و دمـك سـلـط الأضـواء و عرفنه بأئمتنه
لـو مـا شخصك و دمك جان انطوت رايتنه
لا تـوحـيـد لا إسـلام لا نهتدي القبلتنه
فـضلك جازي عالكونين ما ينوصف خدمتنه

يـالـحبك فرض عالناس بآيات الوحي ممدوح
عـشـقناكم و آمنه ابحبكم و العشق مسموح
حـبـنه من الأزل لليوم و باقي لنبعاث الروح
نـرد و نـعـتذر منك و رحمتكم علينه اتلوح
لـو غـيمة جفه مرت الغيمه تنقشع و اتروح
و نـلـتـجـي بـحماك....و العهد وياك
و نـبـدي بخالص النيه....عالفطره الحسينية
بـيـهـا مـعـتـصمين ....إلك مطلوبين

إنـتـه أبصر و أعرف ابشان البشر و أطباعه
قـسـم مـشغوله بالدنيه ابجمع المال طماعه
لـتـزكي و لا تأدي فرض واحد من الطاعه
و قـسـم ملتهيه بالمنكر و قسم للخير مناعه
قـسـم بـالـدين تتظاهر و بباطنها خداعه
ابـوسـط هـذا الموج....انغامر و ذا انفوج
نـقطع ابحور الزمان....نوصل الشاطي الأمان
و بـيـك مـأمـونـيـن ....إلك مطلوبين