عذبني درب الشام ..للشاعر الاستاذ جابر الكاظمي

( مَر عَلينه )

صفت گاع المصايب مَرعى لينَه
اشلون انهار بالطف مَرعى لينه
على اجسوم الغوالب مُر عَلينه
لگاها اجسوم صرعى اعلى الوطية


( مُر بَأهَلنه )

يا خي چاس النوايب مُر بَأهلنه
او من كل صوب شامت مُربِه إلنَه
يا حادي الضعن بالله مُر بَأهَلنه
انتوادع گبل لا نطلع سبية




عذبني درب الشام - ما طبگ جفني او نام
سهمك رماني - آه يا زماني

يا زمن من عندك سبب كل بلواي - من زغري واتگابلت بالظيم اوياي
واجفوني ذبلت من كثر دمع ابچاي - لمن وگع چافل اضعوني الوفاي
عالنهر گلبي طاح - والأمل مني راح
او كل الأماني - آه يا زماني

جمر الغضى ابوسط الگلب حسراتي - صبن دمة من الفرك راحاتي
فوگ الوجن خلن أثر دمعاتي - ابكل الليالي أتگلب ابحسباتي
بالطف عفت هالروح - يم الأجساد اتنوح
والهم ولاني - آه يا زماني

من أمي كسروا ضلع من عندي اضلوع - وشگد صبر عندك يا گلبي المفجوع
فوگ الرمح راس الحسين المگطوع - وعلى الهزل مچتوفة الأطفال اتلوع
أتفگد المضعون - لو سكت إليبچون
غدرك سباني - آه يا زماني

شاب الگلب من الهضم گبل الراس - أتفگد الطفل إليطيح او ينداس
لو أستر العيلة من اعيون الناس - او من ضربوا امتوني صحت يا عباس
يلي جبتني اوياك - هضموني خوية اعداك
ابشدة تراني - آه يا زماني

من گطعوا اچفوفك يا راعي الغيرة - فوگ الهزل من ديرة رحت إلديرة
شحچيلك او أمري صعب تفسيره - تنشدني عنك هند طحت ابحيرة
مني تريد اجواب - وآنه ابدمع سچاب
ما أدري اشدهاني - آه يا زماني

من عگب خدري او عزتي او ذيچ الدار - لني ابخرابة گاعدة او بين أشرار
غلصوب المدينة اتوجهت بالأنظار - يا جدي گوم أنظر يا طه المختار
بس حرم والأطفال - يا الهادي وابيا حال
محد رعاني - آه يا زماني

امضيت أربعين امن الليالي يا حسين - ما بين لوعة گلبي ودموع العين
من شبلك أنشدك خويه عن گبرك وين - او عن گبر أخوك او رايته والچفين
من اليسر رديت - ولگبرك اتعنيت
وإشتد حناني - آه يا زماني