هذا الاكبر .. لو امــير المؤمنين

(اختيار)
*********
هذا الاكبر .. لو امــير المؤمنين
لو رسول الله بالطف .. ياحسين
ضلع امك فاطمه
للسيوف تقدّمـــه
لو رسول الله بالطف ياحسين
*********
صيحه من كَلب الخيام .. تقره لجروحك سلام
يا نبض كَلب اختك ويا نورَ عَينْ
لاتصبّر للدمــوع .. حل وكت ابجي الضلوع
واكسر لظهر الصبر من الونين
آنه زينب كَلبي نار .. بأنتظار الاختيــــــار
شحال كَلبك ياحبيبي ياحسين
هام ابوي المرتضى فحل الفحول
هذا الاكبر .. لو ضلع امي البتول
يا صدر ينزف دمه
للسيوف تقــــــدّمه
لو رسول الله بالطف .. ياحسين
*********
اسألك عن يا مصاب .. وعنك بعيد الجواب
مثل بعد الماي عن كَلـــب الرضيع
حايره وعيني عليك .. وروحي صارت بين اديك
للنجف تنطي الوجـه لو للبقيع
ادري تبقى بلايا روح .. بس علي عنك يروح
ويا كسر يحمل ضلع امي الوجيع
علي الاكبر كلشي عندك من هلي
وكلها عني تروح من يرحل علي
وكَلبك الينزف ضمه
للسيوف اتقــــــدمه
لو رسول الله بالطف ياحسين
***********
عيني تنظر للطفوف .. لو الف بسمار اشوف
ينتظر ضلع الوديعه الطاهره
وانظر لجفنك جريح .. ودمعتك محسن تطيح
تاخذ بروح العقيله الصابره
ساكت شيعني السكوت .. سكتتك تعنيلي موت
يا بعد كَلب اختك احجيلي اشجرى
ابيضّت عيوني دمــع لمن رحل
وانتظر منك تخبّـــــرني الحصل
ياعلي بهالمـــوزمه
للسيوف تقـــــــدمه
لو رسول الله بالطف ياحسين
***********
شَدْ حيازيم الرحيل .. وَاخَذ حماي الدخيل
شخلّه الاكبر ياحسين لعمته
اعذرني لو كَلبي وراه .. طلـــــع يتبّع خطاه
وسمعت الطف لدليلي وصيحته
هنا يوادي كربله .. رفقــــــــــا بعقد الوله
يادخيلك .. لا تيتم بضعته
هذا ابن ملجم رجع لكن الوف
اه واويلاه يا وادي الطفـــوف
وهذا حمــاي الحمه
للسيوف اتقــــــدمه
لو رسول الله بالطف ياحسين
***********
خويه اسئلك بالدموع .. بكل الم اسمه الضلوع
بلوعة الكرار لجروح الصدر
والدك رد الشمس .. رد علــي واحيي نفس
لحظه عن الموت امه شتنتظر
الك ما يرجع دعاء .. وبينك وبين السماء
رفعة ايدك والعسر يصبح يسر
ياعزيز الزهره .. رده لخـــــيمته
وسر كَلب امه يخــــويه برجعته
كَبل لا عهد السمــه
للسيوف اتقدمــــــه
لو رسول الله بالطف ياحسين
________________________________________________

( كلمة ييمه)
*****
ريض يحادي بالضـــــــعن خليني يمه
وليدي وبعد عينـــه انتهت كلمة ييمه
جافيني يا طـاري الصبر
من بعده لا طـــال العمر
انا ام الاكبـــــر شنتظر .. خليني يمه
**************
جافيني ياطاري الصــــــبر ذرني وحالي
شنسه اوغض عنّه البـصر تعبي؟ دلالي؟
لو تمحي من وجـــــــــه الفجر آية الغالي
من عيني ماتمحـــــــــي ابد سهر الليالي
رفقاً يحادي بضنوتي خليني اوافيه
اعصر عيوني اعله الترب بلـكن ترويه
وبدمعي أدكَ باب الكَبر
كَبر الذخــــــــرته للكبر
انا ام الاكبر شنتظر ... خليني يمه
***********
هذا وحيدي يازمن وشظـــــــــل اليه
خليني شمعه اتصـــب دمع حد المنيه
ابكثر ماهـــــــــــــزّن مهد فزعن عليه
ودكَن على صــــدر الربه رآحات اديه
تنشدني نجمات الصبح عن تعبي ورباي
بوجه الفجر كلمـــــا يطر تذبحني دنياي
ولليل اقـــــــــــدّم ياعذر
من ابني اخذ ضيّه البدر
انه ام الاكبر شنتظر .. خليني يمه
********
دنياي ياحادي الضعن وحشه وحزينه
وتابوت كل وسع الفضا من بعد عينه
چـفني همّه الـچنت اظـــن تدفني ادينه
من حضني بأحضان التراب اموسدينه
عطشان محروم العذب علمّني الاسباب
لانشفت ادموعي كَبل ماتروي الاتراب
وعاصف حنيني مايمر
الا يوكَـــــــــدني جمر
انه ام الاكبر شنتظر .. خليني يمه
********
محتاجه اضمن تـربته محتاجه اشمّه
محتاجه يم باب الكَبر جرحي الـچمه
بلـچن يحن اللــــوعتي ويشغر ييمه
عوّدني ابد مايعتــــــــذر لمن احشمه
هيهات يسمع شكوتي ومايطر لحده
وليدي واخذ من درتي عمري التعده
وبالبقه من سنيني تدر
عيني لحد يوم الحشر
انا ام الاكبر شنتظر .. خليني يمه
************
اصبر واصيرله ضمد لو افرضه مجروح
غايب اتانيه ويرد .. ويفــــــــــرح الروح
لكن يحادي بيا عذر اتــــــــرك انه النوح
لاجرح بيه ولا سفر اوليـــــــــدي مذبوح
من همي الوللي للكَبر يبني دللوه
وخوفي يفز اعله الرمح لمن يهزوه
خبرني اسعه ليا كتر
يالحادي ماظل كل فكر
انا ام الاكبر شنتظر .. خليني يمه
________________________________________________

( اول زلزلة)
*******
هذا الأكبر .. علي حيدر .. عادل بوحده الالوف
بكر ابن غانم تحـــــــيّر .. يسـأل عليه الطفوف
هذي أول زلـــــــزله
نزلت بطف كــــربله
هذا الاكبر .. علي حيدر
*********
هذا حيدر بالحــــرب لمن يعود
يخلي عزرائيل مــا يبذل جــهد
وي ملك المـــوت وقعها العقود
واله ثلثــين الزلم شــــرط العقد
نزل اسرافيل يشهد .. عالـعقد من وقعه
ينفخ بصور المنايا .. اليوم يوم الواقعه
كربله هزها الصدى
والحشر تــــــوه ابتده
هذا الاكبر .. علي حيدر
**********
انجفه بسيفه البطـــل بحر الدمه
والركاب الخايـــــــفه تلوذ بركاب
توالت الصيحات حـــماي الحمه
عوّد منين المـــــــفر من العقاب
سمعت لحامي دخيله .. يدوي صوته بكربله
وفزعت خيام العقيله .. تصــيح يا مية هلا
وناده سبع الكنطره
هذي صولة حيدره
هذا الاكبر .. علي حيدر
*********
بدم ابن غانم يبسمل صـــــولته
مثل ابو الحــــملات يختار الاشد
صارت السبعين الف في قبضته
وخزرته تتكـــــــــفل العنه ابتعد
بقافلة اموت يسعه وتبــــــعته اشباح العده
يحدي وين يريد بيهم .. لحد ماكابرهم حده
وفم جهنم ينتظر
بس ينزلها الكبر
هذا الاكبر .. علي حيدر
**********
ابتدت ساعة حـــشرهم والقسيم
واقعه يحولها لو طــــب الحرب
طوى بيها كربله بأمــــــر العليم
مثل فعل السجل من يطوي الكتب
ضامي ذو الفقار لكن من جماجمهم روى
رد عليهم بس جـــهنم بيده نزّاعت شوى
للارض نزلت لظى
والامر بيده انقضى
هذا الاكبر .. علي حيدر
*********